नीलिमा श्रुतिश्रवण प्रतिभासंगमच्या कार्यक्रमात भेटल्या लातूरला. प्रिया धारूरकर,दुर्गेश सोनार आम्ही त्यांच्या घरी पण गेलो. घरात कितीतरी पुस्तकं बघितली. लेखक कवीच्या घरांचा हा एक आकर्षक फिल असतो. वर्तमानपत्रांतून त्यांची लिहिलेली बरीच पुस्तक परीक्षणे वाचली होती. प्रगल्भ आणि खोल लिखाणाची त्यांची लेखनशैली प्रभावी आहे. चिंतनशील जाणिवेची भावगर्भ कविता नीलिमा श्रुतिश्रवण लिहितात. नीलिमा कुलकर्णी या नावानेच त्या आधी लिहित असत. श्रुतिश्रवण हे वेगळं नाव असल्याने तेच लावत जा म्हणून दुर्गेश सोनार सर व आम्ही सुचवलं. श्रुतिश्रवण हे त्यांचं सासरचं नाव. त्यांचा बोलका आणि मनमिळावू स्वभाव पहिल्याच भेटीत आपलासा करतो. त्यांचं कवितेचं सादरीकरण ही उत्तम आहे. हे अक्षरचित्र त्यांच्या जिव्हाळ्याच्या भेटीला सस्नेह.