Ojhal hoti roshni aur neeli syaahi se lipti wo dilli ki shaam, jisme February ki tharthara dene wali thand thi aur office se ghar jaane wali gaadiyo ka shor, jisme kabhi jalte toh kabhi bujh jaane wale peele streetbulbs ki roshni thi toh kahi 6 baje hone wala ghana andhera tha, wo dilli ki shaam, kuch chand logo ki khushi ke badle kayi mayoos chehro ka gham uthati wo dilli ki shaam.
Unhi kuch khush logo mein se ek tha, chandni ka parivaar, aur un sab se zyada khush thi chandni, kyuki pure saal ki uski mehnat ab rang jo laayi thi, nahi nahi 10th ya 12th ka result nahi tha, buss 8th ka hi tha, par chandni ke parivaar ke liye wo bhi bohot badi baat thi kyuki chaandni ne wo kar dikhaya tha, jo aajtak unke parivaar mein kisine nahi kiya tha, maths mein A1 laane ka kaarnama. Toh un timtimaati streetlights aur bhaari traffic jam se guzarte hue aakhirkaar unka parivaar bhi pohoch hi gaya tha, jhandewalan, dilli ke sabse unche aur puraane Hanuman mandir chaandni ke result ki khushi manane, yu toh McDonald's jaana chahti thi wo par mummy ne kaha tha ki mandir ke baad chal lenge McDonald's, isliye muskuraate hue class 9th mein bhi top karne ki dua lekar wo mandir ke andar gayi. Shaam 7 baje ki aarti ka waqt tha aur aisa lag raha tha jaise aadhi dilli ki bheed wahi umad padi ho. Usne apne papa ka haath kaske pakad rakha tha lekin itni bheed thi ki do pal mein parivaar ke sab log alag ho gaye the. 13 saal ki Chandni ka dil dhadkana tez ho hi rahi thi ki uske kandhe par kisine haath rakha, wo muskurakar peeche mudi par bheed mein wo haath kiska tha ye keh paana kaafi mushkil tha, par tabhi wo haath uske kandhe se hote hue uske shareer ki baaki jagaho par jaa raha tha, us February ki kapaa dene wali thand mein bhi uske paishaane par paseena tha aur aankho mein aansu liye un ghantiyo ke beech wo chillaye jaa rahi thi par kisi ne nahi suna, uske shareer ki gehraaiya jinhe kabhi usne bhi nahi chhua, us bheed mein kuch haath unhi gehraaiyo ko baar baar chhu rahe the, kuch der baad ghantiya ruki, aur uski kalayi par usne phir kisika haayh dekha, is baar uske papa ka. Gharwalo ko laga ki kisika pair uske pair par pad gaya hoga isliye wo ro rahi hai. Na chandni bata paayi, na uske gharwale samajh paaye. Jab yak wo aage bhagwaan ki murti ke saamne pohochi wo jo duaa lekar aayi thi wo usr bhool chuki thi, dua toh chhodo, wo bhagwaan ko bhi bhool chuki thi.
Us Ojhal hoti roshni aur neeli syaahi se lipti dilli ki shaam mein, kuch khushi aur kuch mayoosi se lipte chehro ke beech mein us roz phir kisine apna bachpana kho diya.
#RDV19
