Aur phir wo roya.
Pichle hafte hi naye school jaana shuru kiya tha usne. Govt job thi uske Papa ki isliye aadat thi use naye logo ke saath ghulne Milne ki kyuki kabhi 2 saal mein ek Baar toh kabhi 3 saal mein par uske papa ka transfer hota hi rehta tha. Har dafa naye logo se milkar uske chehre par muskaan ki un beshkeemti lakeero se zyada kuch nahi hota tha par is baar kuch alag tha, Kyuki Patna mein toh nahi par Delhi mein sab use aisi nazro se dekhte the jaise wo kisi aur desh se aaya hai. Chehre ke rang ke upar bhi koi kisika mazaak uda sakta hai ye baat Anmol ko Delhi aakar samajh aayi. Pehle 3 dino mein hi wo apne upar itne mazak jhel chula tha ki ab usne un baato par dhyaan dena hi band kar diya tha. Par har baar kisi cheez par dhyaan na dene ka matlab keval ye nahi hota ki use ab farak nahi padta tha. Wo uske rang ki vajah se aane wali hasi ki awaazein, wo uske naye classmates ke anumaan ki wo kis desh se aaya hai, wo taane aur wo mazaak ki lines ka ek ek alfaaz uske aatmvishwaas ke andar ek aisi khokhli surang banaye ja raha tha jiska antt kaha hoga, iska andaza toh anmol ko bhi nahi tha.
Apne labo ko chipka kar wo us bheed ke saamne se har dafa nikal toh jaata tha, par uski rooh har pal ye cheekhna chahti thi, ki uske rang se badhkar bhi kayi cheeze hain uske shareer mein. Uske chehre ka rang is baat ka paimana nahi ho sakta ki wo andar se kaisa hai. Wo mazak wo taane sunkar jo wo sharam ke maare majbooran hasne ka naatak kar leta hai na, uska matlab ye nahi hai ki uske dil ko thes nahi pohoch rahi.
Sacchayi toh ye thi ki use un logo se kayi zyada nafrat khud se hone lagi thi, itni nafrat ki ab us surang ke aakhir mein use roshni dikhna band ho gayi thi.
#RDV19
