Dilon ko khahishon se rok lena hi mohabbat hai Khuda ke waste sab chhod dena hi mohabbat hai Gunahon ki talab ho aur mauqah bhi muyassar ho Magar phir bhi gunah se baaz rahna hi mohabbat hai Kare gumrah jab shaitan neki se humen roke Na us ki baat par kanon ko dharna hi mohabbat hai Lagi ho aag aur yeh aag qeemat ho mohabbat ki Bina dar aag men bhi kood padna hi mohabbat hai Bayaban ek sahra aur jahan khana na pani ho Thaharne ko wahan tayyar hona hi mohabbat hai Budhape ke sahare ko agar qurban karna ho Khushi se yeh chhuri us par chalana hi mohabbat hai Ho peechhe lashkar e jarrar aage ek darya ho Bhrosa kar ke darya men utarna hi mohabbat hai Kisi se dushmani kuchh bhi nahin bas nek chahat men Kabhi gaali kabhi patthar bhi khana hi mohabbat hai Nae'e shaadi nae'e biwi jawani ke maze ko bhi Khuda ke waste qurban karna hi mohabbat hai Khuda tak jo na pahunche wo mohabbat jhoot hai Shakir Ke jeena us ki khatir aur marna hi mohabbat hai ©Karim Shakir #urdu #Poetry #sheroshayari #urduadab #poetryworld #karimshakir #Books
