ਛਟ ਜਾਣਾ ਦੂਰ ਹਨ੍ਹੇਰਾ ਟੈਮ ਤਾਂ ਲੱਗਦਾ ਈ ਆ। ਮੁੜ ਆਉਣਾ ਨਵਾਂ ਸਵੇਰਾ ਟੈਮ ਤਾਂ ਲੱਗਦਾ ਈ ਆ। ਜੰਗ ਲੱਗੇ ਦਰਵਾਜ਼ੇ ਨੇ ਜੋ ਕਿਸਮਤ ਦੇ ਖੁੱਲ੍ਹ ਜਾਣੇ ਕਰ ਤੂੰ ਜੇਰਾ ਟੈਮ ਤਾਂ ਲੱਗਦਾ ਈ ਆ। ਚਮਕੂ ਤੇਰਾ ਵਜੂਦ ਤੂੰ ਹਿੰਮਤ ਹਾਰੀਂ ਨਾ ਹਰ ਠੋਕਰ ਦੇ ਸਿਰ ਸੇਹਰਾ ਟੈਮ ਤਾਂ ਲੱਗਦਾ ਈ ਆ। ਸਬਰਾਂ ਦਾ ਪੁਲ ਬੰਨ੍ਹ ਕੇ ਪੈ ਜਾ ਰਾਹੀਂ ਤੂੰ ਤੁਰ ਹੌਸਲਾ ਚੁੱਕ ਘਨੇੜਾ ਟੈਮ ਤਾਂ ਲੱਗਦਾ ਈ ਆ। ਰੱਖ ਖ਼ੁਦ ਤੇ ਜ਼ਰਾ ਯਕੀਨ ਕਿ ਮੰਜ਼ਿਲ ਪਾ ਲੈਣੀ ਬਰਸੂ ਗਰਜਿਆ ਬੱਦਲ ਜੇਹੜਾ ਟੈਮ ਤਾਂ ਲੱਗਦਾ ਈ ਆ। ਡਾਅਢੇ ਸਬਕ ਸਿਖਾ ਦਿੰਦੇ ਨੇ ਸੰਗੀ ਵੀ ਮੁਸ਼ਕਲ ਜਦ ਪਾਵੇ ਘੇਰਾ ਟੈਮ ਤਾਂ ਲੱਗਦਾ ਈ ਆ। ਸਮਾਂ ਹੈ ਦਾਰੂ ਸਭ ਮਰਜ਼ਾਂ ਦਾ ਵੇਖਿਆ ਮੈਂ ਹਰਜੀਤ ਕਾਸਦਾ ਝੋਰਾ ਟੈਮ ਤਾਂ ਲੱਗਦਾ ਈ ਆ। ..........#ਹਰਜੀਤ ਕੌਰ ਪੰਮੀ ........