एकांत.. ज्याला हवाय त्याला न मिळणारा अन् ज्याला नकोय त्याची साथ कधीही न सोडणारा.. एकांत.. नदीकिनारी,निसर्गाच्या सानिध्यात हवाहवासा वाटणारा अन् रात्रीच्या वेळी कुत्र्याच्या रडण्याप्रमाणे काळजात घर करणारा.. एकांत.. मनाला वाऱ्याच्या हिंदोळ्यावर अलगद डोलावणारा अन् खवळलेल्या समुद्रात त्याच मनाला हेलकावे घ्यायला लावणारा.. एकांत.. आपणहून सुखाच्या गर्तेत गुंग होऊ पाहणारा अन् त्याच चक्रव्युहातून बाहेर पडण्याचा केविलवाणा प्रयत्न करणारा.. एकांत.. पक्ष्यांचा चिवचिवाट मधुर गाण्यासारखा भासणारा अन् तोच चिवचिवाट कधीकधी जीवन किती बेसूर बनवतो याची जाणीव करून देणारा.. एकांत.. येणाऱ्या आयुष्याकडे आशेने पाहायला शिकवणारा अन् आयुष्यभर होऊन गेलेल्या चुकांचा शोक करत बसणारा.. एकांत.. चेहऱ्यावर हास्याची रेघ ओढणारा अन् तीच रेघ हळूच आसवांनी मिटवणारा.. एकांत.. निर्जीव जीवाला जगणं शिकवणारा अन् जगणाऱ्याला शांततेत आतल्या आत मारणारा.. एकांत.. ©शब्दवेडा किशोर #एकटेपणा
