विरघळून गेली सारी दुःखे खाऱ्या पाण्यात ओठावर फुलले हसणे अन सुख दिसले डोळ्यात मी वळून पुन्हा तिकडे पाहणार नाही आता सुरुवात नव्याने केली मी आहे जाता जाता देऊन टाकले सगळे मी कपडे ते विरलेले सोबत सगळ्या आठवणी अन रडगाणे विटलेले ती जुनीपुराणी ओळख सांभाळावी का आता सुरुवात नव्याने केली मी आहे जाता जाता तोच स्पर्श जाणवतो आजही तुझ्या नजरेतुन तू विसरलास का नाही त्या अस्तित्वाची खूण ही नजर खालती जाते का जुनी आठवण येता सुरुवात जरी ही केली मी आहे जाता जाता विसरून देत का नाही हा समाज माझा पेशा भुलतात जरी या इथले अंगावरच्या त्या वेशा बोचतात नजरेमधले त्यांच्या सवाल जाता येता सुरुवात जरी ही केली मी आहे जाता जाता पण हार मानणे नाही हे बजावलेले आहे मी मनास माझ्या इतके कणखर केलेले आहे मारोत कितीही सारे मज येता जाता लाथा सुरुवात नव्याने केली मी आहे जाता जात ---२७/१०/२०२२ @ १३:२८ ©उमा जोशी #विधाता_वृत्त_(२-८-४, २-८-४)
