बाजार संपला सारा कोलाहल झाला शांत घे आवरुन पसारा तू बघ समीप आला अंत जगण्याची ओढाताण केलीस आजवर फार परि अंतिम क्षणास नाही गडबड जाण्याची फार मिळतील तुला जितके ते ओढून श्वास घे पुढचे एकदा इथुन गेल्यावर ना येथे परतायाचे त्या जगात वरती होतो ताळा अपुल्या कर्मांचा जोडून पुण्य पदराला तू फोड घडा पापांचा देवास विनवुनी सांग हा जन्म असो शेवटचा बा तूच दाखवी आता तो मार्ग मला मोक्षाचा ऐकून विनवणी असली प्रिय देवाला होशील फेरा सरेल जन्माचा अन तुला मुक्ति लाभेल २०/०४/२०२३ @ २३:३१ ©उमा जोशी #मुक्ती #उद्धव_वृत्त