शोधत फिरते आनंदाची ओंजळ इवली दु:ख पावलांसोबत माझ्या रांगत येते. मी आताशा पडते उठते सावरतेही.. मनात कातर भिती अनामिक दाटुन येते. जीवन म्हणजे अवघड कोडे असे वाटते, नजरेमध्ये स्वप्न कोवळे तरी भेटते. जुन्या स्मृतींच्या जखमा नाही कुरवाळत मी, रोज नव्याने नवीन वाटा शोधत जाते. कधी गवसतो आनंदाचा सूर अचानक, कधी आडवे दु:ख अचानक गाठुन येते. तरारलेली कळी कोवळी खुडली जाते जीवन म्हणजे खेळ घडीचा शिकवुन जाते. ©Archana Pol ओंजळ